西安胡家廟附近，有位81歲嘅「文花姥姥」，開住一間賣牛板筋、無花果絲嗰類懷舊零食嘅街邊小賣部。佢外孫將她平時碎碎念嘅短片放上平台，通順又暖心嘅發言幫佢吸咗超過11.5萬粉絲。子女就幫老人家將小店搬上網，做起網購幫補家計。
點知網購未做幾耐，就撞正內地電商平台頭號大魔頭：「僅退款」。10月18日，文花姥姥喺社交平台發了一條求助短片，話近期接連有買家收貨之後，直接向平台申請「僅退款」，零食照留，錢全數退返。老人根本唔清楚電商規則同舉證流程，喺度反覆自問：「是不是我自己哪裏做錯了？」
外孫公開嘅後台截圖顯示，10月以來已有數名顧客以「吃了拉肚子」、「零食裏有螞蟻」等理由申請僅退款。最慘係呢間小店利潤薄得可憐，佢女喺受訪時直話，部分零食1包最多賺0.1人民幣（約0.117港元），被惡意退一次款，老人一日的辛勞就白費。佢自己都話：「做買賣要真誠，你看不上東西退回來，我退錢。收了貨又要退款，我想不通。」尾句「人心換人心，四兩換半斤」，真係聽到心碎。
呢啲唔係個案。「僅退款」機制缺乏嚴格舉證審查，被部分不良群體利用成「白嫖」漏洞，甚至衍生出付費教人「0元購」嘅灰色產業鏈，調包童裝、食大半個蜜薯再退款、網購衣服騙退款騙到上百次，小商家苦不堪言。
對於文花姥姥呢種微型個體户，幾宗小額退款，報唔到公安，民事追討又太貴，實係求助無門。內地平台其後已陸續宣稱優化「僅退款」機制，按店舖信用分逐步將退款主導權交還誠信商家，唔再無底線秒批。
姣姐講多句，街市檔口同細商家靠住呢啲一分一毛撐住，被人食得淨光，連追問嘅門檻都企唔到，制度上就有大問題。老人家唔明電商規則係事實，但把規則寫到單向偏消費者嗰人，先至要解釋下係點做錯。
黃姣姐整合｜頂硬上
