日本IP巨頭三麗鷗（Sanrio）喺10月28日深夜緊急發聲明，宣佈終止同TBS日劇《VIVANT》嘅所有聯名合作，並就事件公開致歉。
點解一個「Small Gift, Big Smile」嘅品牌要為部劇割席？《VIVANT》劇情圍繞自衞隊秘密情報組織，其中涉及極端殘酷刑訊場面，將昔日侵華日軍對抗日誌士嘅切指、刺穿腹部等手段套喺現代中國人角色身上，被批刻意渲染「中國威脅論」。
三麗鷗7月已經推出過Hello Kitty及My Melody著《VIVANT》間諜服嘅絨毛玩偶。當預告第2批周邊「已落實發售」時，輿論急遽升温，大批華語網民直斥三麗鷗「背棄和平理念、向爭議題材低頭」。
創辦人辻信太郎因親歷二戰確立「角色絕不涉入政治與暴力」嘅企業理念，但現任社長辻朋邦自2020年上任以來，被質疑未能繼承呢份初心。中國係三麗鷗重要市場：2026年上半年中國收入7.81億元人民幣，按年增長超過四成。深夜致歉，係主動糾偏定市場止損？
日本作家山崎雅弘喺社交平台發文：「三麗鷗啊，怎麼連你也變成這樣了？」亦有日本網民自發喺官方網站遞交反對意見書。
姣姐講多句
講真，我睇呢個事件唔係單純「大品牌低頭」咁簡單。三麗鷗確實喺品牌定位上有明顯矛盾：一面講「和平締造者」，一面又同具地緣政治色彩嘅諜報劇聯名。但「亡羊補牢」同「補利潤」之間，有時只隔一條財務報表。觀眾最憎唔係品牌犯錯，係佢哋犯錯之後，道歉聲明寫得同PR稿咁，冇半句真心。我哋等緊睇嘅，係下批聯名產品入面，仲有冇「諜報元素」。
黃姣姐整合｜頂硬上
