一本寫滿同學名字的「死亡筆記」，喺美國中學校內發現。
事件發生喺美國麻薩諸塞州士他令鎮（Stirling）嘅 Chocksett Middle School。9月30日下午約4時，學生已放學，校方人員意外喺校內發現一本封面寫住「Death Note」的筆記本，入面寫滿多名學生嘅名字，令校方大感緊張。
校方擔心呢份名單係對學生嘅威脅，隨即通報當地警方，並同學校嘅威脅評估小組一齊調查，陸續訪談持筆記本嘅學生同數十名相關學生，想揾出這份名單背後的真正意圖。
校長 Tina Boss 喺寄俾家長嘅公開信解釋，涉事學生喺接受詢問時話，本意係想模仿《死亡筆記》。佢哋調查後話，冇證據顯示筆記本內容係針對學校或特定學生嘅實際威脅。
士他令警方同樣認定，冇必要就此提出刑事指控，但涉事學生仍被校方停學3日。
不過有名字被寫入「死亡筆記」嘅家長 Jen DiCandia 就唔會咁快放低。佢喺社群平台公開表達不滿，話自己女兒就係名單中一人，知悉後相當害怕，甚至因為擔心返學而哭住入睡。佢質疑：點解一個寫下其他同學名字嘅學生，只停3日課就能返教室、坐喺受害同學身旁。佢又話，就算校方已制定安全計劃，受影響學生嘅心理恐懼亦唔會因此消失。
為安撫學生同家長，校方已喺10月1日開集會説明事件，當地警方亦喺10月6日派員進駐校園，透過增加警力可見度，令學生、家長同教職員安心。
硬蕉抽兩句：呢個學生真係以為寫咗人哋個名，人哋就會「心因性死亡」，即係死咗。佢大概唔知道《死亡筆記》嘅筆記本係要配死神 Ryuk 先至有效，光靠自己一支筆係殺唔到人嘅。
真正值得關注嘅，唔係呢個學生嘅中二程度，而係當一個人嘅名字被「記錄」喺呢種符號下面，佢嘅心理反應係真實嘅。停3日、開1次集會、派幾個警察，或許對行政係「合規」，但對一個每天驚怖返學嘅中學生，可能並唔夠。
硬蕉哥整合｜頂硬上
