美國司法部喺2026年8月21日至10月2日期間，向全美多家聯邦法院集中入稟，申請撤銷40名已入籍公民嘅美國國籍。40名被告年齡26至76歲，背景來自墨西哥、中國、巴基斯坦、印度、阿富汗、埃及、委內瑞拉、哥倫比亞、古巴同尼日利亞等多國，涉嫌身份造假、假結婚、隱瞞重罪前科，甚至間諜罪、故意過失殺人同嚴重性侵犯等。呢個規模即引發海外華人同新移民社群關注，擔心自己早年前填N-400入籍表時漏咗細嘢，被政府日後「翻舊帳」。
其中一個案例最離譜：被告巴爾温德·辛格（Balwinder Singh）1992年用第一重身份申請移民被拒，2003年換咗第二個虛假身份重新申請綠卡，2009年歸化入籍，最後靠指紋比對先暴露佢一人分飾兩角。
想撤一個新移民嘅美國國籍，法律上嘅門檻極高：政府須負全部舉證責任，證據要「清晰、明確且具説服力」。司法部要入稟，必須符合三大紅線其一：（1）非法取得身份（Illegally Procured），例如歸化時身分本身建立在虛假婚姻之上；（2）故意隱瞞重要事實（Concealment of a Material Fact），隱瞞嘅事項須具備「重大性」，即若審核時揭露，USCIS會直接拒批；（3）故意失實陳述（Willful Misrepresentation），即主觀上有意識欺騙。
歸化公民最關心嘅係：漏報細個交通罰單會唔會俾政府日後追數？法律現實係，聯邦民事訴訟對撤銷國籍「無追溯期限制」，即使入籍超過30年，只要政府有新證據證明當年存在重大欺詐，隨時可以啟動。所以司法部（DOJ）喺2020年2月已設立「撤銷國籍處」同「撤銷國籍專案組」，未來審查會結合生物特徵同大數據，從抽樣轉為系統性追溯。
實務上有兩點保障權益建議：第一，保存好歷年移民表格副本、官方收據、改名證明同出入境紀錄；第二，如過去申請確有資料不符或隱情，切勿自行補報，應請持牌移民律師做個案分析。
要強調，40宗訴訟只係民事起訴階段，被告喺聯邦法院有完整答辯權同法律救濟途徑，法官未判案前，佢哋嘅公民權完全有效。
姣姐講多句：成件事最「恐怖」嘅唔係40名被告，而係「無追溯期限制」呢四個字。一個成年人，幾年前填錯一個日期，几十年後可以被叫返法庭，而政府有權力有資源有時間慢慢等。美國有憲法有法院，但「追訴無時效」嘅設計本身就係威權邏輯嘅殘餘：公民無權知道自己幾時會被翻舊帳，因為佢冇權知道自己「做錯」咗乜。呢個機制，換個地方，唔需要任何理由。
黃姣姐整合｜頂硬上
