日本手機遊戲《賽馬娘 Pretty Derby》官方嘅世界巡迴演唱會「7th EVENT WORLD TOUR: THE STAGE in LOS ANGELES」，原本排定喺美國時間10月22至23日喺洛杉磯登場，但喺演出前幾日突然傳出因為美國簽證未獲批而被迫取消，令一批已經訂好機票、酒店、甚至已經飛到美國待命嘅粉絲徹底傻眼。
不過喺一眾寧願認賠收嘢嘅粉絲入面，有一位暱稱「もちうささ」嘅日本網友看得很開。佢喺社交平台寫道：「不論最終演唱會能不能辦得成，我都已經在美國了。」佢話，除咗《賽馬娘》演唱會外，加州迪士尼樂園、好萊塢環球影城、盧卡斯博物館等行程本來就喺計劃之內，對呢次美國之行照樣充滿期待。
演唱會尚未正式取消時，「もちうささ」已經抵達美國並入住 Pixar Place Hotel，接住就開住「春麗」隻娃娃逐個景點打卡，逐張逐張喺社交平台發出遊記。
正式取消之後，「もちうささ」自稱「現在在美國的春麗訓練員」，問洛杉磯周邊有冇推薦景點，然後繼續帶住「春麗」坐雲霄飛車、玩轉遊樂設施、喺園內與角色互動。佢話喺日本有很多無法與遊客互動嘅角色，「在這裡不管時間有多少都不夠用」。
呢組遊記喺日本同美國嘅《賽馬娘》粉絲圈都引起廣泛關注，有粉絲稱讚佢一邊「娃活」一邊觀光嘅姿態十分開朗。
姣姐講多句：一個IP世界巡迴演唱會，排到最後一刻先話簽證未批，等於是觀眾買飛到場先收到「門鎖咗」通知。粉絲飛咗一萬哩路飛去嗶谷，結果改做迪士尼一日遊；「春麗」由賽馬訓練員轉職加州遊樂設施測試員，呢個擺尾真係冇人寫得低。行政程序同粉絲熱情之間，有時就係一張簽證距離。
黃姣姐整合｜頂硬上
