英國63歲女子Michelle（米歇爾）做咗一個極大嘅決定：放棄租屋，轉做全職「房屋保姆」（house-sitter），將所有家當裝進汽車，開車穿梭英國同歐洲各地，幫外出度假嘅屋主睇屋、照顧寵物，以此換取免費住宿。
「房屋保姆」就係喺屋主外出時暫住佢哋嘅屋，打理環境、照顧毛孩，唔使付租金水電，只需交配對網站嘅會員費。呢個模式令佢每月最多可省約1,500英鎊（約1.6萬港元），全年最多慳下約1.8萬英鎊（約19萬港元），將省落嘅錢全部放落旅行。
佢最近接落嘅工作，係到英國德文郡（Devon）睇管一幢建於16世紀嘅古老農舍，四周有約25英畝（約10公頃）土地，要喺度住足兩個月，照看房屋、修剪花圃、照顧寵物。據悉，佢未來半年嘅睇屋行程已經排滿。
要過「無固定住所」嘅生活，佢首先將原住處大部分傢俱捐畀慈善商店，只留生活必需品同有紀念價值嘅嘢，盡可能塞進車尾箱。佢坦言，最難嘅唔係冇屋住，而要捨棄多年收藏嘅心愛衣物同紀念品。
Michelle亦承認，長期獨自上路、不斷適應新環境，偶爾都會覺得孤單、同熟悉嘅社交生活脱節。但佢認為，唔再被固定住所同朝九晚五束縛、可以不斷探索新地方，令佢感到前所未有嘅自由。佢無論去邊都帶住最喜愛嘅馬克杯同毛毯，好令陌生嘅屋都有啲「家」嘅感覺。
硬蕉抽兩句：我哋呢度嘅人一生為「有屋」折腰——蝸居、板間房、劏房、天台屋，一生人攞幾百萬供一個幾十尺嘅鐵皮箱。佢嘅解法好英國：唔供嘢，住別人嘅屋。你供咗幾十年，最後嗰個箱係唔係仲要換新？
硬蕉哥整合｜頂硬上
