昨晚TVB《女神配對計劃2》播出第七集，12位素人求愛勇者對上7位女神（含兩位隱藏女神），齊齊挑戰「心跳」主題考驗。全場最熱嘅要數阮嘉敏（Mandy）、譚梓樂（Hepta）同吳旭東（東東）嘅三角局面。
大家都當Mandy同東東係一對，結果佢最終入咗Hepta嘅心跳電話亭，全場震驚。Mandy直頭講：「上次玩摺衫我揀咗丁標，其實嗰日我係內疚咗成日嘅，我到今日都記住呢件事，下次我要跟番自己心意。同埋佢（Hepta）為我做咗好多嘢架，我話我唔食飯，佢就即刻行咗去幫我剝肉，呢件事淨係我哥哥幫我做過。」
東東雖掉淚但表現大方：「她有她的選擇嘛，我理解，但這是我的生理反應。」Mandy即刻向佢解釋：「我唔想再戀愛腦，我真係想揀個我合適，我覺得咁樣都對你公平。」
真係要起底呢位「最強素人」：Hepta係量化交易員，年薪50萬港元，專長排球同業餘健身。佢報名時喺擇偶條件一欄直接寫「Mandy就係我嘅理想型」，參加節目原因欄寫「如果Mandy畀隱藏女神取代退出節目，我會同佢一齊退出」，專一達至Man爆境界。
佢成晚嘅表現真係洗版：幫Mandy備眼藥水、做「快樂小狗格仔餅」；為唔聽廣東話嘅東東當翻譯；知道東東唔開心就拍佢膊頭，落淚時仲即掏紙巾畀人，網民笑稱「重點係佢有帶紙巾，真係好加分」。
姣姐講多句：年薪50萬，照樣要排隊求愛，呢就係香港兩性市場嘅殘酷現實。有錢解決唔到心連心，但Hepta證明晒：用心，真係比高薪有殺傷力。Mandy呢季真係「最強女神」，公道、細心、説到做到，嗰種成熟處理感情嘅態度，連花生團都洗版讚。
