台慶劇《璀璨之城》開播咗陣，除了劇中一眾女演員的大膽演出引熱議，兩位男主角張智霖同吳卓羲之間嘅兄弟角力都係焦點。兩佬昨晚（18日）上《東張西望》，暢談再次合作嘅感受，仲大爆二人私底下嘅深厚交情點樣養成。
原來兩人早在2012年《衝上雲霄II》已經結過緣，今次同劇嘅江美儀當年亦有份參演。但吳卓羲坦承當時同張智霖「唔係太……太熟」，身旁嘅張智霖即刻打趣接話：「因為佢係同吳鎮宇一齊㗎嘛！」吳卓羲聽完連聲認同，仲笑稱：「因為我太入戲，覺得呢條友一定係欺負我。」場面十分搞笑。
到底點樣由「唔熟」變到拍檔？吳卓羲笑言，直到近年兩人一齊參加內地綜藝節目，長時間同吃同住、一齊旅行、一齊同節目組角力，先至熟落。「變相我哋嘅默契就喺嗰度嚟。」佢仲爆料兩人每晚都喺度討論：「聽日場戲點搞啊？點樣舒服啲？對白順啲？」張智霖更係「畀咗好多意見我，『不如咁樣？不如試下咁樣玩，會唔會好睇啲？未做過啊？』」
談到劇中兩人鬥生鬥死嘅兄弟關係，張智霖有一套「有情無義／無情有義」嘅理論：「大家可能會算計大家，但心裡面其實我最痛錫嘅係佢，或者最明白我嘅反而又係佢。」吳卓羲亦點頭認同，直言：「我都係奸㗎了……但係我心裡面，佢依然係我最錫嘅阿哥。」
姣姐講多句： 原來後輩對前輩嘅「戒備」，全部係入戲太深搞出嚟。後嚟一齊住一齊行，所謂敵對仲變到最錫嘅阿哥，呢種「誤讀」先至真係抵玩。
黃姣姐整合｜頂硬上
