59歲資深藝人鄧兆尊重前坐監杜汶澤旗下網台「喱騷」全新清談節目《男人萬歲》首集，同主持梁栢堅、廿四味成員阿肥（陳偉雄）同貝依霖傾中年男人危機，嘉賓另有音樂人馬米同男性專科治療師Able。
節目入面，鄧兆尊以古人追求女子嘅「潘驢鄧小閒」自居，話自己主要靠財力吸引異性，仲話「好似對方睇中個四萬幾蚊嘅Chanel手袋，我會衡量四萬幾蚊，你到底值唔值呢？」
最誇張嘅係，佢突然爆圈中有位「頂級集郵女星」：「我哋圈入面有個集郵女星，集咗好多人，而且生得好靚女，基本上由一線、二線到三四線男星，佢全部都集齊晒，『呢個郵票我有，嗰個我又有』。」
主持追問姓氏同背景，鄧兆尊即刻封口落閘：「唔講得啦！一講大家就一定知！」佢只大方交代，同該女星曾有合作經歷，但「絕無感情瓜葛」，更自嘲：「佢冇集我，因為嗰陣我啱啱出道，個人好瘦！」唯一線索就係一句「佢而家50幾歲喇」，引大批網民熱議、猜測身分。
消息一出，各大討論區根據「五十歲以上」及「曾與鄧兆尊合作」兩線索，翻查鄧兆尊九十年代初出道作品名單，江欣燕、佘詩曼、伍姑娘、陳煖、李麗珍、關之琳等均「中槍」入列。
陳煖就事回應，話「我完全唔清楚，因為我冇留意個節目」，與鄧兆尊「私底下係唔認識佢，冇任何嘅聯繫」，可能只係喺活動見過幾次；對被無端列入嫌疑人，佢稱「唔會太關心呢件事，冇任何Comment（評論），興趣不大」。
姣姐講多句：「集郵」呢個詞用喺人頭上，本身就係一種將人當藏品嘅説法，聽佢講得咁得意，倒想問返——真係「集齊」咗，點解仲要「一講大家就一定知」？真係集齊咗，應該係靜悄悄放喺抽屜入面，唔好俾人逐張數先。
