TVB《璀璨之城》收視節節上升，吳卓羲同張曦雯劇中甜蜜火花引爆熱議。眾演員聚埋睇戲，張智霖竟帶頭圍攻張曦雯，仲被江美儀即場揭穿「面都紅晒」，嗑到似層層。
陳維冠監製嘅暗黑名門爭鬥劇《璀璨之城》，自播映以來收視節節上升，根據上週跨平台直播收視報告，最高收視達22點（141萬觀眾），係TVB自2025年（截至目前）首周最高收視劇集。
昨晚（20日）第七集，雪瑩Kate（張曦雯飾）同孝君（吳卓羲飾）因劇情起了小爭執，一幕為時約分半鐘嘅一Shot落場口，二人由走廊走入房間、再轉移到窗邊講數，情緒變化（由忟憎理論到和解）同前後走位互換都拿捏得精準。Kelly（張曦雯）沉船微表情獲讚，鏡頭前又流露甜蜜得戚樣，配Ron（吳卓羲）嘅寵溺表情，甜度爆燈，加上肉緊激咀畫面，令不少網民懷疑二人係真CP，觀眾亦大讚「真係好襯」。
搞笑嘅係，眾演員（不包括吳卓羲）聚埋睇第四集，事後接受《東張西望》訪問時，張智霖竟帶頭圍攻張曦雯呷醋，Kelly對此甜笑不停，仲被揭發緊張狂玩衫袖，更令佢與Ron嘅緋聞似層層。
張智霖即場篤爆：「你睇嚇佢（張曦雯）隻手捏到。」Kelly解釋：「唔係呀，我覺得畫面錫得靚。」江美儀加入戰團：「你面都紅晒喎。」張智霖：「你做乜啫，你平時都唔係咁。唔好再搲，爛喇，成個魚網袖都爛晒喇。」、「真假其實唔重要，最重要係結果」。
姣姐講多句：一部劇最難得就係劇內劇外都花生遍地，演員嘅「火花」仲喺鏡頭外爆到。但大家留意，呢啲「緋聞」多數係劇組花生，真真假假最緊要係睇戲享受，唔好將戲外互動當實錘。真CP定係好同事，留待時間同佢哋自己證實啦。
黃姣姐整合｜頂硬上
