在泰國某省一間狹小嘅出租房，住住一個31歲一個31歲嘅男子Pu。佢同伴侶同住，成日食飯都有個習慣：飯粒卡到蛀牙洞，就用牙籤猛剔。就係呢個「細路都識做」嘅日常，釀成一個令人瞠目結舌嘅後果。
疑因長期反覆用牙籤刺激患處，引致左臉組織嚴重發炎同病變增生，腫塊隨住時間愈長愈大，最後長成一個如半個人頭咁大嘅巨瘤，左臉腫大兩倍，仲伴隨劇烈嘅疼痛，令佢情緒陷入絕望。Pu坦言：「不知自己還能支撐多久。」
為求醫療同經濟援助，Pu早前將自己嘅遭遇同照片上載社交平台，想揾幫手。點知迎嚟嘅唔係援手，而係大量網民質疑呢啲相係用AI生成或者修圖軟件加工，批評佢藉此製造虛假消息。
幸運嘅係，專頁「Met Jaochainoi」嘅創辦人Met早前親自走訪Pu嘅住所探望，證實佢嘅病情同困境完全屬實，並即場向佢遞上救助金。Met強調，公開相片已獲得當事人及其伴侶授權，目的就係想藉此案例警示大眾：口腔若有蛀牙或異常疼痛，應立即尋求正規牙醫診治，切勿自行以硬物刺激患處，以免釀成不可逆轉嘅嚴重後果。
硬蕉抽兩句：蛀牙就揾牙醫，呢句廢話簡單到極，但成堆人唔信，拖到最後先後知後覺。呢單嘢真正令人不寒而慄嘅，唔係佢張臉，而係一個真人受苦，反而被成堆人聯手指做「造假」——懷疑AI容易，見到真人受苦就唔好第一時間踢佢落坑。
硬蕉哥整合｜頂硬上
