Tesla（特斯拉）旗下叫車服務 Robotaxi 10月29日喺 X 帳號放出一段萬聖節應節短片，片中一輛金色塗裝、車身印有「Cybercab」字樣嘅無人車喺夜間馬路上穩定前進，車廂內部特意打上綠光，兩具骷髏道具如乘客般端坐其中，畫面一啲唔似正常廣告，即刻喺網上引起熱議。
片段入面，車內屏幕發出微光，配合綠色燈光同兩具骷髏乘客，營造出詭異嘅夜遊氣氛。呢個畫面將萬聖節經典恐怖元素同自動駕駛車結合埋，反差到位，冇人會將佢當普通產品宣傳片睇。
不少網民覺得呢個場景創意十足，有人喺 X 留言話「冇人比得上 Tesla 嘅幽默感」。Robotaxi 同日稍早都上傳咗另一段片，呼籲市民萬聖節狂歡後用佢哋嘅服務回家。Tesla 亦喺同期推出「萬聖節模式」及相關軟件更新，為車主加埋節日特色功能。
硬蕉抽兩句：做產品宣傳片做到「最接近真實」——無人車載住兩具骨，夜晚行咗成個街，仲冇人話佢係廣告，呢個唔係 marketing 係 behavior art。
硬蕉哥整合｜頂硬上
