杭州一名網名「小勺」嘅「00後」女生，出生於2002年，畢業於浙江中醫藥大學臨床醫學專業。佢喺醫療器械相關企業做咗約一年，因為長期業績壓力同每日收到工作訊息，今年8月辭職，轉做自由職業上門煮飯，近日喺網絡走紅。
佢自己話，學醫嘅嘢冇浪費：外科訓練養成嘅洗手同衞生習慣，直接帶入備餐流程；營養學同生化知識，用嚟喺口味同健康之間攞平衡；而解剖學，則幫佢睇清楚肉嘅肌理同組織結構，切肉切得「得心應手」。每次到屋企開伙，佢會戴口罩、手套，做清潔消毒；為長者、兒童或有特定飲食需求嘅客户，另訂菜式。
有客户得知佢係醫科生之後，話「醫學生」三個字自帶一份信任感。佢舉例，有一次為一位獨居客户做咗三道家常菜，服務費88元人民幣，食材由客户網上預先買好，佢上門做清潔、烹調同廚房整理。
資料圖片：Pixabay
目前佢以家常菜同聚會單為主，每日最多接三單。入行第二個月起月收入穩定喺約5,000元人民幣（約5,900港元），日均實際工作時間約3小時，經營成本主要係往返的士費，冇舖租壓力。
面對「放棄學醫是否可惜」，佢答：每個人的賽道不同，肯定有比佢更熱愛醫學嘅人會去當醫生。佢亦表示，學歷唔係衡量人生價值的唯一標準，現職比返工自在。
硬蕉抽兩句：喺港讀完五年醫再返埋去行執，呢個大概係「下凡」嘅最高形式。解剖學幫人分豬肉、外科洗手幫人切生菜、營養學幫人配沙拉——呢三個嘢擺埋一齊，係本站今個月最成功嘅「專業錯配」。
硬蕉哥整合｜頂硬上
