南京一名保研助教喺輪休日行山，因冇帶工作手機、5小時冇覆家長微信，隨即被公司「全方位問責」，數日後更被解僱。佢攞住900張加班截圖，正式入稟仲裁討回公道。
江蘇南京一名姓盧嘅研究生推免（保研）輔導助教，就因為喺休假行山嘅5小時冇覆家長微信，最後竟然畀公司解僱，仲要捱「全方位問責」。
盧女士係2026年3月中旬入職「南京必研好輕鬆教育科技有限公司」，合約寫明標準工時制，每星期唔超過40小時、每週至少有一日休息。10月17日下午，正係佢嘅輪休日，佢去山區行山，因為山區訊號差，冇帶備工作手機。呢段時間，有一名公司視為「重量級客户」嘅家長喺微信服務群諮詢學業，長達5小時冇人回覆，即向機構主管投訴。
行完山落嚟，盧女士就收到多名主管嘅密集電話斥責，仲喺各內部工作群被公開炮轟。更誇張係，同日晚上8時，佢嘅組長喺群內臨時頒布「新規定」，要求全員「即使在休息日，也必須盡量每隔3小時查看1次手機」。
資料圖片：Pixabay
隨住事情惡化，10月23日晚，佢被無預警剔除出所有工作群，內網權限全數註銷；10月25日，公司正式送達《解除勞動合同通知書》，列明解僱理由包括「在辦公室處理個人事務、將內部溝通截圖外洩侵犯隱私」以及「涉嫌在公眾平台發布不實言論」。
面對呢種操作，盧女士決定自保。佢出示公司內部教學指引，明寫要求員工喺公休日定時登入工作賬號3次；績效考評「服務執行規範與及時性」佔35%，客户一不滿仲要再扣25%。佢再花數日整理，湊齊逾900張深夜、清晨同公休日被迫處理工作嘅通訊截圖，證明自己長期「隱性加班」。
10月28日，盧女士正式向南京市棲霞區勞動人事爭議仲裁委員會遞交申請，追討違法解除合約嘅雙倍賠償金（2N）同長期拖欠嘅加班費。
姣姐講多句： 呢種「公休日每3小時查一次手機」嘅規矩，講出嚟都嫌荒唐，但竟然真有人敢喺群組入面寫落嚟。佢攞900張截圖入稟，係打工仔面對隱性加班最實際嘅反抗。
黃姣姐整合｜頂硬上
