外賣電單都唔放過
沙田老牌屋苑第一城嘅鎖車隊，向來被網民笑指「快過F1」，連外賣電單車都唔放過。9月30日，Facebook群組「第一城居民心聲」流傳一張照片：第一城商場及街市建築群「置富第一城」對開，一輛電單車前輪被紅色鎖車架牢牢固定，三名警員正喺場跟一名南亞裔男子交談，據樓主講，佢就係被鎖車嘅外賣鐵騎。
網民冷嘲
照片一出，網民笑到合唔埋嘴：「師兄新手？唔應該接第一城嘅單」、「無咗三分一人工」、「講真，送個外賣啫，咁都鎖，都係揾餐飯食，慘」。最狠係有網民反問：「報警又如何？係咪報完之後唔使畀錢，免費幫佢解鎖呢？」
呢句「報警都冇用」，大概係對香港「鎖鎖鎖」文化最貼切嘅註腳。
姣姐講多句
第一城鎖車隊嘅威名，確實令到好多鐵騎繞道而行，甚至有外賣車手拒接上址訂單。外賣車手辛苦跑單，唔小心停靠錯位置，就即刻俾人鎖咗，報警都未必幫到手。呢個係真實嘅荒誕，都係香港小人物生存嘅縮影。鎖車隊有得鎖，鐵騎冇得揀。笑完之後，都係有啲酸。
