馬斯克（Elon Musk）旗下嘅太空公司SpaceX，近日喺社交平台貼咗一張招聘廣告，要喺加州帕洛阿爾托（Palo Alto）招一名壽司師傅。時薪寫住32.5至35美元，摺合約$253至$275港元。
條件寫住要美國公民或「綠卡」持有人，學歷最低高中，要喺餐廳或廚房幹過至少三年；想入選仲要識喺壽司廚房幫手、有烹飪藝術學士學位，每日要出創意餐單。
真正令網民睇到笑，係廣告入面嘅「附加要求」。除咗加班呢類常見項目，其餘絕大部分都係體能：每日站立工作最多10小時；喺冇人協助嘅情況下推拉50磅重物；搬運或提舉25磅物品至少2小時以上；單日累計跪蹲動作可以達6小時。廚房環境仲要攝氏26.7度以上。
資料圖片：Pixabay
呢張廣告貼出後，有網民10月28日喺X（原Twitter）揶揄，話馬斯克應該係想請個真人壽司師傅，俾Tesla Optimus機械人錄象，收集動作數據，好讓佢「學習」點樣切壽司。
硬蕉抽兩句
時薪$275，放喺香港都係茶記後巷同倉庫師傅嘅級數。一個將火箭打到太空嘅公司，用人成本竟然可以睇落咁貼地。科技巨頭嘅光環再耀眼，落到「附加要求」入面，就變返係最古老嗰種血汗工廠式用人成本——時薪幾錢、日站幾耐、拖幾多磅。笑完笑完，打工仔見到「日站10小時拖50磅」，都應該諗下自己個時薪值唔值得。
硬蕉哥整合｜頂硬上
