韓星孫藝真日前喺日本橫濱旅行，18 日喺個人社交媒體上載多張照片，配文「祝大家有個幸福的星期天」。相入面她坐喺遊樂設施上舉手燦笑、對住海邊比 V，全係最放鬆嘅日常。就係呢啲「毫無偶包」的隨手照，竟引來一波毒舌。
部分網民完全冇理會佢想講嘅幸福，就執到佢穿搭上面，留言「今天穿搭又不行了」、「就素人大媽水準」、「沒時尚感的話，連私服也交給造型師打理吧」、「感覺完全不懂時尚」。講得好像佢穿黑T恤配牛仔褲加墨鏡、灰色大學T搭白色長裙同運動鞋，係犯了咩宇宙級時尚罪一樣。
呢次都唔係首次。佢6月出席「第46屆黃金攝影獎頒獎典禮」，禮服同髮型都被酸「造型師是黑粉」；9月佢晒兒子幫佢度嘅日常照，私服同樣被拎出討論。由紅地禮服到度假隨手拍，樣樣都逃唔過放大鏡。
姣姐講多句：女星上相係工作，但私服就係「我今日想點穿就點穿」嘛。黑T恤加牛仔褲係全球最安全嘅日常公式，居然都有人話「素人大媽」，唔知平時着運動衫拖鞋出街嗰位，係咪真係諗自己係時尚博主？明星都有權着得平凡，網民真係唔使執到呢度，多關注自己個櫃枱啦。
部分粉絲同路過網民亦發聲，不滿呢類對私人分享的過度指指點點。
（資料圖片）
