近日，有網民喺 Facebook 群組「裁員炒人消息關注組」發帖，對港人湧去深圳消費表示百思不得其解，大嘆：「都唔明啲香港人點解係咁樣從皇崗過關去消費」。佢更質疑深圳以至關口附近嘅食肆，好多根本係香港老闆開，既然兩邊都有生意，特意過關消費根本多此一舉。
帖文一出，即時被大批網民圍攻。對方直言：消費只看價錢同質素，邊個開嘅店根本不是考慮因素。「我相信唔關係咪香港人開定大陸人開嘅事，最主要就係平過你香港，香港去邊消費大部分錢都係幫人交租」、「唔應該睇邊個開，係睇好唔好食同抵唔抵」。
有網民仲用行日本去日本旅行做比喻反問：「香港夠有好多日本貨品啦，係咪做唔好去日本？」另外有常客分享實戰經驗，話自己返去頭療按摩都幫襯香港人開嘅店，食飯都幫襯港人日料，「的確好多香港人開，平過香港」；又有人話「平到唔信，明天又北上買游水海魚，香港三分一價錢又夠秤又好服務」。
除咗平，消費體驗都係關鍵。有網民直言：「香港人工貴、租金貴！自然轉嫁俾消費者！你食完拿拿淋想趕你走！做多轉生意！品質一定唔會好！北上消費！唔一定會平好多！但消費體驗一定比香港快樂！」同埋「最緊要比香港平又可以做大爺」。
唔少網民都提醒唔好喺關口附近消費，「佢地當香港人係水魚咁劏，過咗關去遠啲冇咁多香港人嘅地方消費」。另外有網民提到「科技狠活」，亦有網民反駁，話香港都有預製菜問題，「時代變喇」。
據入境處數據，剛過去嘅重陽節長週末，新皇崗口岸17日錄得約15.2萬人次出入境，其中超過八成半為香港居民。
姣姐講多句：「平靚正」三個字，而家已經唔係單純嘅美食評語，簡直變咗一代港人嘅消費宣言。呢個討論好值得玩味：一邊係「支持本港」嘅身份情緒，一邊係用腳投票嘅真金白銀，最後唔係靠口號，係靠錢包決定。而樓主「深圳食店好多係港人開」呢個論點，就好似同食肆講「你老闆係我同學」，食客聽完只會話「關你咩事，平唔平先係重點」。
黃姣姐整合｜頂硬上
