山東威海一位47歲嘅貨車司機胡宏基，今年3月開始自學人工智能，專門鑽研AI智能體（Agent）。佢話最癲嗰陣一日連玩20幾個鐘，單日甚至燒超過8億個Token（詞元）。模型唔收錢，Token收；佢執嘅紙皮回收，AI收錢。
Token開支越滾越大，銀行户口又冇積蓄，胡宏基索性開始執紙皮同其他廢品，送去回收站變賣，換AI服務套餐。佢話平均一週執一次，一次嘅收入大約夠付一個月嘅Token。除咗執廢，佢仲有時間就再上車拉貨。佢話而家每月真正拉貨同做散工嘅時間唔足一半，約8成精力全部投喺研究。
生活過到幾縮食？佢自述最艱難嗰陣，由每日兩餐改成兩日先食一餐，「一個多禮拜，就靠買10塊錢嘅饅頭，饅頭就白水，就這麼過來了」，配白開水捱過一個多星期。佢自比「AI苦行僧」。電腦係部2019年買嘅MacBook，佢話卡到影響開發，打算趁「雙十一」換部新嘅。
資料圖片：Pixabay
呢個執紙皮嘅人點樣變成「怪教授」？佢透露，自學AI之前已經有做嘢：曾自掏腰包數萬元、聯絡威海高新區公安部門，建咗個反詐騙答題網站，至今運作接近3年。自學AI後佢又想將技術用到貼地，研發咗個叫「AI健康醫生」嘅工具，想幫長途貨車司機監測久坐同作息帶來嘅健康問題，另外亦有研究AI自動影片剪輯。呢個經歷令佢喺開發者圈子被網民稱為「怪教授」，並獲邀出席GIAC全球智能應用開發與架構大會，與業內學者、技術專家同台交流。
佢嘅母親對佢點解要節衣縮食去搞AI一直唔明，但表示兒女成年，養活得活自己、冇做違法傷人嘅事就唔多問。對於人哋話「不如用AI快啲賺錢」，佢話：「只活著花不了多少錢，不考慮未來，過好當下」。
硬蕉抽兩句：話「AI要餵Token」嘅人，通常係坐喺冷氣房入面開口，佢哋唔知有個人每日要起身去執紙皮，就為咗換一單「算力」。但講到10元人民幣（約12港元）一週只食饅頭白水，呢個就唔係「苦行」，係真嘅飢寒。熱血可以自學，生命唔好當Token燒。
硬蕉哥整合｜頂硬上
