最近「現在的殯葬業都發展成這樣」呢句，成功衝上微博熱搜。網傳一段片，拍住一架大疆無人機被改裝成觀音菩薩造型，端坐蓮花台、周身纏滿LED燈帶，夜間升空，仲放緊DJ版《大悲咒》；旁邊另有一架仙鶴造型小飛機作伴，飛喺上空一齊「送飛」。
殯葬業者話呢個叫「賽博送葬」，唔係乜新玩意。將無人機改裝成仙鶴或者觀音，載上逝者人偶同音響，升空時配合燈光同音樂，象徵隨菩薩「飛升」。最勁嘅係，有服務仲結合AI技術，採集逝者生前嘅聲音，喺空中播出一段專屬告別語——人未見，聲先到。
價錢方面，老闆開牌：單架無人機送終至少5000元人民幣，雙機組合（觀音加仙鶴）超過1萬元人民幣。HK01補充指，呢個價錢並非一般家庭都能輕鬆負擔。
片一出，啲網民即刻放開。有笑「5000元飛一次，夠我奶奶在村裡放三天大戲，還能請兩桌嗩吶」；有打趣，爺爺生前最愛聽戲，若知道身後改播DJ版《大悲咒》，「恐怕會氣得從盒裡坐起來，把無人機打下來」。仲有話大疆恐怕也沒想到，旗下無人機最後竟然會被拿來「送人上西天」。
佢亦指出，年輕人睇多係覺得荒誕好笑，但對部分農村老人而言，呢種帶有傳統菩薩與駕鶴西去意味嘅飛行告慰，有另一層嘅心靈慰藉。
硬蕉抽兩句。科技無善無惡，無人機可以送快遞、可以航拍，都可以送人上西天，關鍵係賣家賣咗乜、買家買咗乜。真係「只要肯花錢，什麼花樣都敢想」，呢個「只要肯花錢」三個字，先至係真正嘅底線問題。觀音無人機飛得幾高，都飛唔出呢個邏輯。
