今年9月，內地女黃女士獨自到馬來西亞沙巴州仙本那（Semporna）旅行，入住一間日租達人民幣千元嘅度假村。9月某日凌晨，佢確認房門已反鎖、陽台已鎖定後入睡，卻被一名陌生男子潛入房內，暴力撕破貼身衣物，企圖強行侵犯。
黃女士在緊要關頭奮力反抗，掙脱糾纏後奪門而逃，因深恐嫌犯追截，只好躲進度假村外嘅灌木叢中，徹夜不敢閤眼，直至天色大亮確定安全才現身求救。佢隨後趕往醫院驗傷及接受治療。
事件最令人震驚嘅，係事發後嘅處理。黃女士因驚魂未定未能及時收拾房內物品，未料度假村員工隨後擅自替佢整理行李，並直接將該件可能殘留嫌犯指紋及DNA嘅破損衣物打包，致使警方抵達現場時未能第一時間提取原始物證。黃女士多次要求調取客房周邊閉路電視畫面，管理層卻以「當日降雨導致鏡頭畫面模糊、拍攝角度受限」等理由推諉，宣稱無法提供客房門口嘅具體畫面。
警方調查後確認，涉案男子案發當晚正以度假村值班保安身份巡邏，疑利用職務之便取得通行權限或備用門禁卡潛入房間。經查證，該男子根本無任何在馬來西亞合法居留及工作嘅證件，係度假村為節省成本私下僱用嘅非法勞工（即「黑工」）。佢近日已被裁定非法侵入住宅罪成，判監2年；強姦未遂等性侵指控仍待進一步調查。
圖片：CEphoto, Uwe Aranas／CC BY-SA 3.0／Wikimedia Commons
事件曝光後，涉事度假村非但未停業自查，反在各大訂房平台繼續招客，且房價有所上升，至今未向黃女士發出任何正式書面道歉，只提出金額「極其微薄」嘅和解方案。黃女士指單是律師費已花人民幣3萬元（約3.53萬港元），對方賠償數額「説出來都覺得荒謬」。佢目前已離境返回中國，後續法律行動全權委託馬來西亞當地律師跟進。
北京京都律師事務所林斐然律師分析指，度假村未落實背景審查、違法僱用黑工，且夜間門禁管理存在顯著過失，對旅客負有不可推卸嘅法定安全保障責任。林律師直言，度假村企圖「願賠不認錯」，本質上係以「人道救濟」為名掩蓋管理過失，規避正式侵權責任同行政處罰。
呢件事暴露嘅唔係單一罪犯問題，而係「黑工＝零培訓、零監管」嘅制度漏洞——一個仲無合法居留嘅人，點樣可以執到能開客人房門嘅門禁卡？
黃姣姐整合｜頂硬上
