講到鋰電池，最常見嘅恐懼係「機仔爆炸」。但原來手機爆炸未必係壞事，有時甚至係救命。
俄羅斯阿爾泰邊疆區索爾通（Solton）附近，一名15歲少年同另一名24歲男子去森林查看家中蜂箱，突然被一隻棕熊撲出。少年即時爬上樹想躲避，但棕熊竟然將佢從樹上拖返落地面，再抓再咬，場面相當凶險。
同行男子講：「我聽到他尖叫，轉頭一看，見到棕熊已把他從樹上扯下來，於是我放狗。」
就喺呢個時候，意外發生：棕熊咬中佢後褲袋入面嘅手機，手機鋰電池破裂起火，火光同爆聲竟然將頭棕熊嚇退。手機爆炸亦造成佢臀部及腹壁熱燒傷。
比斯克中央城市醫院首席醫生科維亞津（Sergei Kovyazin）指，病人送院時頭部、頭皮、面部骨骼及頸部有多處損傷，「這些傷勢構成最大挑戰」，另據報胸部、腦部及腹部亦受重創，少年接受三小時手術。
硬蕉抽兩句：坊間成日憂「手機爆炸」，但呢單事件證明，手機有時真係可以喺關鍵時刻「發威」救你一命。不過呢種「發威」嘅代價，就唔使細講了。要行山、行森林，最好先查下當地有冇危險動物活動，手機有幾「發威」都唔好作。
事件曝光後，當地部門派出三支快速反應隊伍及至少12名獵人到現場搜尋涉事棕熊。據官方統計，入夏以來俄羅斯全境棕熊數量已逾30萬隻，近期襲擊事件有所增加。
