日前台灣新北市瑞芳，有網友喺台二線濱海公路旁發現一處天然巨岩。呢塊岩石經年風化加上海浪侵蝕，喺特定側面角度望過去，高挺鼻樑、下巴、頭部輪廓同頭頂嘅特殊線條，同美國總統特朗普（Donald Trump，又譯川普）嘅側臉同招牌髮型神似，即刻喺網上引起熱議。
呢處奇岩原本冇正式名稱，而家已經俾熱心網友命名為「瑞芳川普岩」。有人仲直接喺 Google 地圖標註呢個地名，留言「讓瑞芳再次偉大」。已經有網民實際行去打卡，貼出現場照，寫下「兩個小時前到此一遊」。
網民嘅回應愈玩愈有：有人問「5星好評能換10%關税嗎？」，有人笑「川普要來認親一下吧」，仲有人話「可以為了這顆石頭安排一趟本地遊」。一塊天然石頭，瞬間變成新打卡勝地。
硬蕉抽兩句：天然岩石被風化海浪雕成「特朗普岩」，係純自然現象，唔代表任何政治立場，更加唔代表呢塊石會自己加徵關税。但將「讓瑞芳再次偉大」呢種玩嘢同現實關税政策擺埋一齊，就見到大國政治嘅荒誕程度——石頭仲要俾人點讚先有存在價值。
硬蕉哥整合｜頂硬上
