美國鹽湖城嘅普林斯頓化學工程博士 Jack Weis，2024年畢業至今寄咗超過2300份履歷，連申請冷凍蟹餅廠都石沉大海，最後搬返父母地庫住。
Weis 喺萊斯大學（Rice University）最優等成績畢業後，2018年入讀普林斯頓大學攻讀化學工程博士，2024年攞到博士學位。佢研究化學原理同分子相互作用，目標係入製藥公司做科研，但畢業至今已經寄出超過2300份履歷，仍然揾唔到一份穩定正職，最後搬返父母地庫住。
Weis 笑言自己「只係一個住喺父母地庫嘅失業者」。佢最初申請科研職位同國家實驗室嘅博士後獎學金，後來擴大範疇去投軟件工程，最後連食品加工類工作都碰壁，包括一家販售冷凍蟹餅嘅公司。透過招聘網站寄咗數百份求職信，大部分石沉大海，只有少數收到拒信，連面試機會都冇。
有一段時間，佢透過一間名為 Mercor 嘅初創公司，以時薪70美元（約549港元）兼職，利用工程同流體力學知識去訓練 AI 系統。然而，呢份工作喺今年3月中旬無疾而終，佢係喺一個有810名成員嘅 Slack 群組收到一紙通知，得悉 Mercor 終止咗佢嘅合約。
資料圖片：Pixabay
有經濟學家形容美國勞動市場目前處於「低招聘、低解僱」嘅環境，企業喺疫情期間瘋狂搶人，疫情過後卻大幅收縮招聘，Weis 剛好趕上呢個轉壞時機。
Weis 嘅父親，同樣持有博士學位嘅約翰，表示：「我哋做夢都唔想到佢會遇到呢啲問題。佢係鷹級童軍，樂於助人，有環保意識，身體健康，甚至比我更聰明、更善於表達。」
喺過去兩年間，Weis 嘅求職狀態一直停留在「審核中」。今年10月，佢登入洛斯阿拉莫斯國家實驗室嘅求職帳户，發現2024年申請嘅個職位已經請咗人。
「硬蕉抽兩句」：普林斯頓博士，最優等畢業，喺「低招聘、低解僱」面前，原來只係一個「普通」地庫仔。2300份CV，連面試機會都冇幾份，呢啲唔係失業，係「低招聘」得咁徹底。學歷再硬，都頂唔住呢個大環境。
硬蕉哥整合｜頂硬上
