11月7日（2026年）保良局週年慈善晚會，胡杏兒、陳百祥、彭健新、劉浩龍、菊梓喬、谷婭溦、Amanda S.等多名藝人到場撐場。一晚之間，幾段「花生」齊齊爆出。
菊梓喬正忙緊排練演唱會，想出新歌做生日禮物畀歌迷，又話自己會「永遠以音樂為生」。早前吳卓羲與張曦雯的緋聞傳得火熱，「前緋聞女友」菊梓喬聽畢，笑言「關係圖好複雜」：「我唔係好了解個人物角色設定。前同前嘅被傳我又唔知邊個，咁所以嗰個表呢，我係唔清楚。」佢話自己唔睇任何八卦新聞、比較宅，被問到近排有冇同吳卓羲約食飯，佢反問「你講邊個呀？」，最後仲約記者去食飯，成功化解尷尬。被問想唔想上 HOY清談節目做嘉賓，佢話大表贊成，「梗係出賣人啦，唔好出賣自己」。
真正「肉搏」嘅係陳百祥。佢話自己上次已捐咗百萬予保良局，「唔係錢嘅大小問題，其實係出呢個心」。佢更爆：「聽講保良舊年開始唔用 TVB 添，我諗下年都係咁。因為請唔到大牌，我就用我嘅關係，去揼心口去請，所以佢就揾我。」即係話保良局下年可能唔再同 TVB 合作辦籌款節目，改由佢自己出面。
谷婭溦則透露正籌備「再唱一次・廣東歌傳承計劃」，已灌錄咗張國榮〈風繼續吹〉、羅文〈感激説話千百句〉同陳百強〈一生何求〉，話：「當我唱呢一啲經典歌嘅時候，我唱到喊呀。我好恨自己唔係出生嗰個年代。」
姣姐講多句：同一晚，星島頭條喺同一事件出咗兩篇標題相反嘅稿——一篇話「陳百祥爆保良局將與TVB合作籌款騷」，另一篇則話「將不與TVB合作」。細睇正文，兩篇都寫住陳百祥「舊年開始唔用TVB」、下年可能唔再合作。一篇標題同自己嘅正文打臉，呢個「新聞事故」比晚會本身仲好笑。
黃姣姐整合｜頂硬上
