10月20日，紐約多個華人聚集區突然出現大批聯邦執法人員。FBI聯合多個執法機構，喺法拉盛、布碌崙八大道等地展開突擊搜查，現場搬出一箱箱貼住「證據」標籤嘅物品。紐約州長隨後證實，呢場持續數月嘅調查涉及100多家涉嫌違規嘅機構，重點係洗錢、回扣同醫療福利欺詐。
法拉盛紅太陽成人活動中心（Kent Senior Care）發生嘅一幕最係有戲。當天早上8點半左右，聯邦醫療保險同醫療補助服務中心（CMS）負責人梅赫梅特·奧茲（Mehmet Oz）親自到訪，同中心負責人當面對質。奧茲指出，帳單顯示中心經常接近滿員，但現場卻冇咁多老人；中心負責人解釋，當時先係早上8點半，好多老人仲未嚟。奧茲再追問：點解部分帳單寫住老人一週嚟五天，負責人卻話好多人通常只嚟兩三日？
跟住，奧茲行到一張麻雀枱邊，話咁話問：「美國納税人應該付錢畀大家打麻將嗎？定係，呢個係醫療麻將？」負責人答：「呢個係免費嘅。」奧茲即刻反駁：「呢個唔係免費嘅，係納税人出錢俾佢哋打。」奧茲反問，聯邦白卡資金究竟應該用嚟畀人打麻將，定係應該優先用嚟做挽救生命嘅心臟手術同癌症治療。
同一日，奧茲又去咗法拉盛另一間中心——Evergreen Adult Day Care。經理話每日有150到200名老人到訪，但奧茲指佢哋只見到約25人。更勁嘅係，隨行嘅Fox News記者發現，簽到表上竟然出現10月22日同23日嘅名字——而當日先係10月20號。奧茲當場指責中心存在欺詐行為。
紐約州長霍楚同日公開回應，指呢係州衞生廳、白卡監察長辦公室同聯邦政府經數月合作調查嘅結果，涉及100多家涉嫌違規嘅機構。佢警告：「我哋會揾到你，起訴你，追究你嘅責任。」
根據州政府數據，紐約目前共有400多家相關機構，服務約4.5萬名白卡受益人，每年支出超過5億美元。紐約州早喺今年7月已暫停批准新嘅成人日間護理機構，暫停至少持續到2027年1月。霍楚現更要求衞生部門喺12月31日前提交改革建議，其中一個選項，係逐步取消現有日間護理福利。對依賴呢啲中心做日常社交嘅數萬長者而言，受影響嘅可能先係佢哋自己。
硬蕉抽兩句：聯邦主管喺護老院見到雀枱，第一反應唔係「唔錯，打過幾鋪」，而係開口問「呢個係醫療麻將嗎」——呢個落差，先係真正嘅荒誕位。
硬蕉哥整合｜頂硬上
