10月18日，日本成田機場香港航空登機櫃位，發生咗一件網絡上熱議嘅事：一家四口香港家庭，疑因不滿花咗 $1500 買單程機票卻冇飛機餐，喺櫃位前大鬧，不停責罵地勤人員，要求升級去商務客位，或者賠償 4 個飛機餐嘅金額。
事發當日，同航班一名乘客喺 Threads 發布咗一段約 1 分半鐘嘅影片，目擊該家庭「佔領個櫃位」，以英文質問地勤點解冇飛機餐。地勤人員多次耐心勸説，希望佢哋先移開行李、讓其他乘客處理登機手續，但該家庭冇理會。丈夫以英文稱「I don't care」「I wait here」，仲要求地勤「You don't touch（不要碰行李）」，否則弄污或損傷由對方負責。
最精彩嘅位嚟喇：丈夫要求「anyone speak Cantonese？」，地勤回應「No」之後，丈夫即時譏諷「Your English is not good enough（你的英文不夠好）」。花咗千幾蚊，連一句英文都話人地唔好，仲要人地幫你升級，呢個邏輯，就算你大鬧，都唔代表你啲嘢係啱嘅。
網民反應大致分兩派。一派批評佢哋「西客」「影衰香港人」「最大問題唔係佢投訴乜，係佢嘅姿態」；另一派則認為可能是臨時改機型導致冇飛機餐，但處理手法唔智，「可以要求航空公司作出書面證明以便日後追討，而唔係大吵大鬧影衰香港」。另有網民讚揚地勤人員耐心冷靜處理。
硬蕉抽兩句：地勤人員全程耐心、冷靜應對，最後反獲網民讚「處理得好」。但真正問題唔係地勤，係你花咗 $1500 買機票，出發前應睇清楚票價包含咩服務，餐食供應或會因應航空公司航線同實際營運要求作出更改。另外，喺機場霸佔櫃位、阻礙通道、拒絕配合指示，按 IATA 指引及各大航空公司《乘客及行李運載條款》，地勤及機長有權拒絕你登機，甚至要求機場保安或警察介入。$1500 蚊買個氣受，還要全球直播，呢單嘢，真係唔值。
硬蕉哥整合｜頂硬上
