Netflix 上週宣佈裁員 6%，一連串高層人事變動喺過去幾日接二連三落地，電影部首長 Dan Lin 就係其中一個被「請」走嘅。
據消息人士指，Netflix 共同 CEO Ted Sarandos 喺星期五致電 Dan Lin，通知佢已遭解僱。有意思嘅係，被通知走人嘅 Dan Lin，其後竟然照常頂住出席咗星期六嘅奧斯卡晚宴（Academy Gala），仲同 Sarandos 喺同一個房間坐住，星期日又出現喺《La Bola Negra》電影人嘅放映會，做足一個「冇事人」。
上週 6% 裁員嘅「犧牲者」當中，已經包括主內容官 Bela Bajaria，同 Dan Lin 嘅副手 Doug Belgrad。業界消息指，Netflix 正喺股價疲軟、用户參與度下跌嘅同時，全面重組創意領導層，資深電影同電視高管 Peter Rice 將接手重整平台內容。
講到 Dan Lin 點解會被炒，業界有唔同版本：有人講係 Sarandos 急住要喺星期二嘅季度業績之前，向華爾街賣一個「增長」故事；有人則話佢喺「黏性串流內容」同「院線發行實驗」之間找不到平衡。亦有消息指佢同 Greta Gerwig、Ben Affleck 等一線導演就《Narnia: The Magician's Nephew》項目有過爭執，但呢啲細節冇正式證實。
Dan Lin 任內主打「緊縮」同「質勝於量」，被喻為帶住「紅筆同砍刀」入職；佢嘅前任 Scott Stuber 就因為花太貴請人、2022 年承諾每週一部新片而逐步收斂，最終喺 2024 年年中離任。
姣姐講多句：大廠人事洗換，喺業績壓力下從來唔係新鮮事，呢個「血腥星期一」對 Hollywood 老手嚟講只係另一個例牌週末。真正值得關注嘅，係 Netflix 對院線同串流之間嘅定位，會唔會喺 Peter Rice 手上真正改變。
黃姣姐整合｜頂硬上
