江蘇南京一名陳姓男子日前傍晚約7至8時下鍋蒸8隻大閘蟹，因當日工作累到散晒，洗完澡上床便一覺睡到朝早9時。等他想起廚房仲開住火，衝落去一看，8隻蟹已經變成焦黑一片，輕輕一捏就碎成炭狀——乾燒通宵，連鍋底水都燒乾，全部碳化成灰。幸好火勢冇波及周邊雜物，冇釀成火警。
最奇嘅係，陳先生指佢成晚都冇聞到焦味。佢話全部要感謝家中抽油煙機，整夜「盡責」運作，將刺鼻焦味統統抽走，令佢安心瞓到天光。
相關影片喺網上瘋傳後，大批網民卻「錯重點」——冇人問蟹乜事，反而齊聲追問：「抽油煙機乜牌子？」「喺邊度買？」「有冇連結？」笑稱呢係「最強廣告」，甚至有人對鍋具都耐燒表示驚訝，笑言「鍋竟然冇壞」。
另有網民就安全層面留言，指「冇著火已算萬幸」，「再瞓耐少少，變焦炭嘅就係佢」。亦有網民質疑一個男人深夜一個人蒸8隻蟹嘅情節較為罕見，懷疑涉及廣告或擺拍，惟目前冇證據證實。
兩家媒體對時長同蟹價記載略有出入，有指乾燒逾12小時，另有指陳先生睡足13小時；蟹價方面，一家指8隻總值約300元人民幣（約350港元），另一家指每隻約35元人民幣。
陳先生事後以自身經歷提醒大眾，煮食期間千祈唔好瞓着或離去。
硬蕉抽兩句：呢單事最搞笑，係全網都冇人同情嗰8隻蟹，反而集中火力研究抽油煙機——蟹燒咗無人問，抽油煙機盡職反成主角。呢現象喺好多人屋企都見到：抽油煙機成日開足馬力，主人公反而成日瞓到死。
硬蕉哥整合｜頂硬上
