近日 Threads 流傳多段喺港鐵港島綫車廂拍攝嘅短片，畫面令人瞠目結舌。一名中年女子對一名年輕男生大肆咆哮，聲聲爆粗「死窮鬼」、「垃圾」、「乞兒！乞丐」。令人意外，佢全程冷靜，甚至「用魔法打敗魔法」，不斷將大媽嘅話原樣重複，又「影帝上身」佯裝身體抽筋，搞笑畫面令車廂乘客鬨堂大笑。
據 Threads 多個帳號上傳嘅影片，事緣大媽無故喺車廂對周圍乘客出言不遜，其中一名男童無辜被咒罵。佢見狀挺身而出，護住母子，反成為詬罵目標。影片亦見佢用普通話同對方對話，佢答「我係香港人」，大媽反問後佢竟脱口而説「英國人」，大媽一頭霧水，場面極為荒誕。
最搞笑一幕係佢假裝身體抽筋，企圖嚇窒對方。有影片更見佢以第一身角度錄片，大媽揚言要「劈落部手機」，佢舉手擋著。
事件發酵後，佢本人於 Threads 現身，交代事發經過，強調「全程平靜冇受到傷害」，並就車上騷亂對其他乘客造成不便致歉。佢指見到小朋友被咒罵，所以出手阻止。金鐘站下車後，被保護嘅男童對鏡頭舉起勝利手勢以示感謝。
網民反應不一，不少人盛讚佢 EQ 高、沉著冷靜，「高手就係淡定」、「四兩撥千斤」，甚至指佢係「可造之才」。亦有網民質疑點解冇乘客啟動緊急裝置，或聯絡職員協助。
【姣姐講多句】 呢個事件係典型港鐵日常生存術案例：面對無理取鬧者，冷靜就係最強武器。佢未選擇對抗，反以幽默化解，甚至「影帝上身」，實屬高階操作。港鐵附例第 25 條及第 28H 條規定，於鐵路處所作出滋擾或使用粗言穢語，最高可罰款 5,000 港元。
黃姣姐整合｜頂硬上
