10月25日，一段港鐵站內升降機衝突影片喺Threads廣傳，即時惹起網民熱議。影片長約1分半鐘，見到一名身穿V領上衣、手拎三袋重物嘅大媽，企圖「攝位」闖入一部已經擠滿乘客、入面仲有BB車嘅升降機，場面相當戲劇化。
女職員到場處理，示意「閂門閂門」，大媽卻聲稱「呢度大把空位」，硬要闖入。女職員解釋「有BB車喺入面，逼唔到」，升降機內嘅女子亦説「有BB啊」，勸大媽等下一班。大媽唔收手，更突然發難，伸手疑想攻擊升降機內嘅女子，導致門一度無法關上；女職員見狀奮力把大媽阻在門外，高喊「唔好搞事啦」。
門關上後，大媽轉頭向女職員大發脾氣，狂罵「妳咁樣處理唔得㗎！大家都係公民！你咁樣屈到我啊！」，又問「點解我唔入得LIFT呢？」女職員保持冷靜，一一反駁：「我知道，但係入面有BB車，已經無位」，「個個都想你出嚟，裏面有BB車。其實下一班都好快就到」，甚至直接點破「但問題人哋都畀唔到妳攝到嘛。妳有3袋嘢，阻住閂門。」大媽反問：「佢哋可以落，我唔落得？」
資料圖片：Pixabay
最終，喺另一名男職員到場協助、加上其他等候乘客「圍攻」説「下一班好快啫，咁都有得嘈！」嘅壓力下，大媽終安靜乘搭下一班升降機離開。
網民普遍批評大媽離譜：「搭遲一部會死咩？」「嘈嘅時間仲耐過搭下一班𨋢」「咁好中氣就行樓梯啦」，又大讚女職員「做得好」「辛苦晒港鐵職員」。
【姣姐講多句】 大媽睇住一部塞滿人仲有BB車嘅升降機，開口就話「大把空位」，呢個反差真係好大。BB車係全港最應該禮讓嘅位，「攝位」都唔該攝。女職員全程霸氣又專業，值得一個like。
【法例補充】 根據《港鐵附例》第25條「乘客不得造成滋擾」，在列車上或鐵路處所作出滋擾行為，最高可罰款5,000港元；第28.A條(b)款又規定，干預或故意妨礙港鐵設備運作，最高可罰款5,000港元及監禁6個月。
