講到《蒙娜麗莎》，有冇人留意過佢冇眉毛同睫毛？呢個老問題爭咗幾百年，而家多咗一個「醫學假説」：佢可能正正患上「鬼剃頭」。
事件主事係意大利皮膚科醫師萊諾（Luigi Laino）。佢喺今年8月喺《臨床皮膚病學》（Clinics in Dermatology）期刊發表論文，研究文藝復興巨匠達文西嘅傳世名作。
萊諾指出，畫中女子（被視為麗莎·瑪麗亞·蓋拉爾迪尼）有四項特徵符合圓禿（Alopecia Areata）症狀：冇眉毛、冇睫毛、髮際線後移得不自然，以及無瑕皮膚。佢仲補充：「只有圓禿能同時解釋這四項特徵。」
圖片：Leonardo da Vinci／Public domain／Wikimedia Commons
其實呢個「冇眉毛」問題，藝術史界早有幾派講法：一派話係16世紀佛羅倫斯上流社會剃眉、剃前額髮嘅時尚；一派話係幾百年自然褪色，或早期修復時不慎洗走表層薄顏料；仲有派話係達文西最鍾意嘅暈塗法（Sfumato），眉毛睫毛係最後先畫嘅細節，而呢幅畫佢一直帶喺身邊，從未視為「完成」。而家，又添咗一個「醫學與健康假説」。
論文仲提及，蓋拉爾迪尼15歲嫁咗名絲綢商人，30歲前生六名子女（兩名夭折），所處年代飽受政治動盪、宗教戰爭同瘟疫；對易患圓禿者而言，這些壓力加上多次懷孕嘅荷爾蒙變化，或會增加嚴重脱髮風險。
硬蕉抽兩句：講真，五百幾十年都冇人畫好嘅眉頭，而家要由皮膚科醫生代達文西「補」。學術界研究範圍無限擴大——由文藝復興畫技，做到毛囊免疫學——連《蒙娜麗莎》嘅禿頭都要俾人開論文，可謂學術圈最細心嘅「髮際線研究」。
