武打演員何麥離世後，女友Christie首度回應女兒何慈茵「無名無份」指控，承認拍拖33年從未註冊，指因Mark早年在英未離異、來港後再有婚史。
武打演員、劉家良入室弟子何麥（Mark Houghton）離世，惹起一連串後事風波。他女兒何慈茵（Charlene）公開點名女友Christie，話對方長期以「老婆」自居，但兩人從來冇一紙婚書。Christie其後接受電話訪問，首度正面回應，並透露多段婚史內幕。
關於為何三十幾年都冇落紙，Christie解釋Mark二十一歲喺英國已經結過婚、留有一個兒子，但至今未辦手續解除。她更指Mark大約27、8歲來港做嘢時先後再結兩次婚，「其實係重婚嘅」。她話自己拍拖約一年多後先知悉，並一度提出分手；Mark則親口解釋，其中一次係因為有了孩子，對方逼佢結，「如果唔結婚老竇就打死佢」，話等小朋友出世後先離婚。Christie承認最終佢選擇接受，未再追究。直至約兩年前，因Mark之子喺英國舉行婚宴、過程疑生不快，英國方面寄回正式離婚判決文件，Mark先至真正回復「自由身」。
點解一直唔逼對方補領證？Christie哽咽話，自己知道Mark頭兩位配偶互相認識，佢唔忍心重蹈覆轍「搞散人哋」，搞到對方「精神病要食藥」；佢覺得兩人相愛真愛已足夠，「有一張紙算得啲乜？冇意義㗎」。
針對女兒質疑其貪圖Mark名下之財物（一車一遊艇），Christie指自己一直有正式收入，曾任龍蝦供應商，車同遊艇都係自己出錢買；其中遊艇十二萬，喺西貢購入，有收據有人證。佢並反駁何慈茵「自己一直經濟上資助父親」之説，稱Mark只收過兩次錢、兩個月，每個月一萬蚊；第三個月何慈茵跟Mark講「呢啲錢其實唔係我畀你嘅，係媽咪畀嘅」，Mark即答「你唔使畀啦，我唔要」，所以就止。
姣姐講多句：三十幾年都冇去執一紙證明，全部因為「唔忍逼」；但名份始終係實打實嘅保障，唔會因為真心相愛就自己喺度出現。名份、金錢、良心，邊樣先至係真正嘅底線？
黃姣姐整合｜頂硬上
