福建泉州惠安縣一間寺廟，日前遭一名男子「借」走人民幣2千元香油錢，最囧係佢離開之前，仲行到神桌前畀返1元人民幣，好似喺度跟神明懺悔咁。呢一幕被 CCTV 完整錄下，曝光後即刻掀起網友熱議。
事發喺某日中午。寺廟李姓管理人員食完飯返大殿，發覺功德箱空晒，即刻報案。佢話自己平時駐守大殿，只有食午飯嗰陣會短暫離開，未估到畀人捉住呢個空檔。
警員翻查 CCTV，見到一個男人在大殿入面行來行去，神情極度緊張，不斷探頭望門口方向。確認無人之後，佢行到功德箱前，熟練咁取出預備好嘅工具，將入面鈔票逐一黏出放入口袋。
最搞笑就係行竊完，佢冇即刻跑，反而行到神桌前，靜靜咁放低一張1元人民幣，先至匆忙離開。
資料圖片：Pixabay
警方依 CCTV 線索迅速鎖定，不久就拘捕咗38歲覃姓男子，並當場追回被偷嘅人民幣2000元。
覃男事後向警方交代，放呢1蚊嘅目的，就係「祈求神明原諒自己嘅行為」。呢個講法傳出，網友集體笑到噴淚。
姣姐講多句： 偷咗2000留返1蚊，呢個找數率仲未茶餐廳低。但講真，如果神明都收呢1蚊當懺悔費，嗰2000蚊就真係冇位還。最正係佢仲「熟練咁」帶工具，呢個唔係初犯嗰樣。
黃姣姐整合｜頂硬上
