最近小紅書有篇帖文好有共鳴。一位喺港工作已第八年嘅內地博主，逐條拆解自己同本地同事「撞枱」嘅經歷，總結咗4大中港職場文化嘅差異。佢話內地人慣了「識做人、識變通」，但喺香港呢套做法未必管用。
一、收工就係收工，唔好再揾我
佢話內地人放工都習慣下意識睇工作訊息，唔覆好似有啲唔妥，甚至擔心影響上司印象。但香港同事收工之後就「消失」，群組靜到咁。佢坦言初時好唔習慣，但耐咗就覺得呢種分別工同生活嘅做法，反而令人有真正休息。
二、規則就係規則，唔好求我通融
內地人處理問題多數先想「點樣搞定」，但香港同事多數先問「規則允唔允許」。佢舉例：營業時間幾點就幾點，熟客都唔會通融。初時覺得「點解要咁較真」，但時間耐咗反而省心——「規則就喺嗰度，大家知道邊界喺邊」，唔使估對方底線，人際壓力細咗。
三、私隱唔好再追問
喺內地，開工會聊人工、婚姻狀態、幾時結婚，都係拉近關係嘅話題。喺香港，除非對方自己講，一般唔會主動追問。同事可以聊工作、聊旅行，但私人生活彼此尊界線。佢話呢種看似疏離嘅相處，反而令人少一份壓力。
資料圖片：Pixabay
四、食飯AA制，唔使計「上次佢請，今次輪我」
內地職場請客食飯係建立關係嘅手段。喺香港，同事各自付款係常態，唔會因為你今日買單就覺得你「識做人」。
佢最後感嘆：香港並非冇人情味，而係邊界好清楚，工作歸工作、生活歸生活。佢強調無意比較邊個地方好，只係提醒來港嘅人搞清楚「遊戲規則」。
帖文引起港人回響，有網民指「依法辦事係文明社會基本」，亦有網民用「電梯口過度禮譲會令身後嚴重淤塞」做比喻，話邊界感係香港人口密集、講求效率嘅基礎。
姣姐講多句
呢4點冇乜新，但佢講得清楚、講得具體。對港漂朋友講，呢啲唔係「文化衝擊」，係基本操作。同理，我哋港人去內地，開工會唔問人工、唔話邊個請客，都係一種「不可同化」嘅堅持。邊界感係雙向嘅，唔好唔好，各自舒服最緊要。
黃姣姐整合｜頂硬上
