曾拍TVB劇集的前DJ路芙，近年開拓副業，經朋友介紹兼職加入殯儀業。她在節目中揭露，見工第二天老闆就約她食飯，她以為係複試，對方卻話「想同你做個朋友」，並表明不聘請她，最後改以「Agent（中介）」形式掛單，路芙同意。不過合作因出糧問題而反面收場，最終鬧上《東張西望》。
每趟車被扣50蚊
路芙指合作初期已有價錢爭拗，她提出$450做4個鐘，揸車接駁牧師都照計4個鐘，公司卻每次扣$50，理由是「工作係5小時，只得400元」。佢話：「我揸咗6次定7次，佢每次都扣我50蚊，係咪好離奇呀？」
一單佣金扣剩5千
首單交易路芙收15%佣金，公司話後續服務轉俾另一位同事跟進，佣金被扣剩約$5,000，路芙當時冇再追問。
拒簽一年禁業條款，佣金被截
第二單價值萬元的交易，公司突然要求路芙簽署一份合約，否則佣金扣減至$2,000「介紹費」。合約「Item 12」要求員工不論被解雇或自願離職，一年內不得從事任何殯儀相關行業，亦不得拉攏同事。無底薪的佢憤怒直言：「我揾食工具嚟㗎嘛，我都要生活，點可能一年呢？」佢因為不肯簽約，一直被拖欠萬元佣金。
鏡頭前對質，疑暗示全行封殺
路芙致電老闆Carman對質，對方稱「有叫同事揾你簽」，並話「唔簽冇問題，咁你咪當介紹費囉」。Carman得知路芙「報東張」後更為激動，更疑似暗示路芙搞大件事將會被全行封殺，話：「你唔使揾《東張西望》……你要咁樣搞，你都唔使做殯儀㗎喇。」
路芙在鏡頭前按捺不住，直接要求：「10700蚊係咪畀我嘅？寫定張支票影畀我睇，無謂嘥時間啦。」
在節目介入跟進下，公司最終妥協出票，路芙成功追回$10,714。佢話行業入面「出唔足錢」時有發生：「會做咗cut咗你啲錢，或者唔畀錢，跟住揾藉口嚟推搪。」
姣姐講多句：呢件事值得講的，唔係路芙拍過乜，係一個無底薪的中介，做埋上線，因為拒簽一份一年禁業條款就唔畀錢。佢做咗乜，同佢收唔收到薪俸有乜關係？呢個條款，換任何行業嘅打工仔，都會同樣唔簽。成件事最令人窒息的位，係Carman疑似用「你唔使做殯儀㗎喇」噺全行封殺，來解決一單帳目——用行業封殺去處理欠薪，聽落比那份一年禁業更窒息。
