「成日等佢啲 message，已讀唔回就焦慮」「佢有錯都幫佢諗藉口」「為討好佢取消健身、見朋友」——如果你覺得好似自己，不如行落嚟聽下醫生點解。
「戀愛腦」呢個詞近年流行，形容人喺感情入面過分依賴另一半，情緒、決定、價值感全部掛喺對方身上，甚至犧牲健康、工作、人際。台灣精神科醫師楊聰財講得直接：呢個唔係「愛得深」，而係對愛情過度依賴。佢亦提醒，「戀愛腦」唔係正式精神醫學診斷，但背後牽涉真實嘅生理同心理機制。
生理上，楊聰財解釋戀愛初期多巴胺分泌增加，帶來愉悦、期待同類似獎賞嘅感受；去甲腎上腺素令心跳加快、注意力集中喺對方，催產素、血清素變化則同依附感有關。換言之，戀愛時大腦確實可能出現類似成癮嘅獎賞機制。心理層面，童年缺乏安全感、曾被忽略或有創傷經歷者，可能更害怕被拋棄；低自尊者，又可能把「被愛」當成證明自身價值嘅方式。
楊聰財舉咗個例：一名 32 歲女子，交往初期男友十分呵護，半年後開始限制佢同男性同事聚會，佢陸續取消健身課、停止同朋友見，甚至放棄海外進修。男友時常冷戰，又偶爾送禮道歉，每當佢想分手，一句「沒有妳我活不下去」又令佢心軟。直到長期失眠、焦慮、工作表現下跌去見心理師，佢先意識到自己真正怕嘅係再感受童年被忽略、被拒絕嘅孤單；重建自我價值同社交後，先有力結束呢段關係。
楊聰財又指出，令人困喺不適合關係嘅，還有「沉沒成本」——投入咗多年感情同青春捨唔捨得；以及「間歇性增強」——伴侶時而冷漠、時而示好，如同唔定期俾獎賞，反而叫人更難抽身。佢建議，若因感情長期焦慮、抑鬱、失眠，或陷入反覆分合、情緒操控甚至暴力關係，應考慮尋求心理諮商或精神醫療。
姣姐講多句：呢篇唔係恐嚇人，而係想講明一件事——「被愛」從來唔證明你自身價值。真正健康嘅關係，唔會叫你為咗一個人，把朋友、工作、健康都拋低。如果你而家正處於「知道唔好但就走唔出嚟」，唔好等自己撐唔到先求援，找心理輔導唔係丟臉，係對自己負責。
黃姣姐整合｜頂硬上
