利比亞最高宗教機構 Dar al-Ifta 喺的黎波里發布咗一份 Fatwa（宗教裁定），禁止穆斯林買、賣、着任何帶 Nike logo 嘅衣物。理由係：Nike 呢個美國運動品牌名源起希臘勝利女神，個 Swoosh 翅膀 logo 又係以女神翅膀為靈感，所以露出呢個 logo 等於「推廣與多神崇拜有關嘅符號」。
呢份裁定由利比亞總穆夫提 Sadiq al-Gharyani 批准。雖然 Fatwa 唔係政府法令、唔設具體懲罰，但喺該國社會有相當影響力，並冇宣佈全面禁售 Nike 產品。
同一份裁定，Dar al-Ifta 亦批評 Nike 支持以色列，呼籲穆斯林抵制佢哋，並引用咗佢哋研究委員會喺 2023 年 11 月 5 日發出嘅聲明，該聲明要求穆斯林抵制佢哋視為支持以色列嘅西方企業。
圖片：Tripoli Tower of Lions unedited.tif : Photo dept., American Colony Jerusalem d／Public domain／Wikimedia Commons
社交媒體反應唔一：有網民歡迎，亦有網民批評呢份裁定係「ironic」，認為係對更緊迫問題嘅「分心」，冇人提點名具體議題。
硬蕉抽兩句：一雙跑鞋，點樣就變成宗教犯罪？Nike logo 嗰道翅膀，喺呢度睇就係「希臘神話符號」，着喺身上就等於「拜神」。照呢個邏輯，Adidas 三條紋可以係「希臘柱式」、Van Cleef & Arpels 四葉草就係「基督教幸運符」——而後者，正正係佢哋上一年已經裁定過嘅嘢：話四葉草設計「同基督教信仰同追求好運有關，違反伊斯蘭」。呢種以宗教為名嘅審查邏輯，同「政治正確」執法之間嘅雙重標準，確實耐人尋味。
Nike 喺利比亞冇設官方店，惟 Nike 品牌產品喺當地球鞋店仍有售，運動品牌喺北非普遍受歡迎。
硬蕉哥整合｜頂硬上
