李家鼎（鼎爺）細仔李泳豪5日喺社交平台正式宣佈，首次同父親以「父子檔」合作主持全新飲食節目，同檔主持仲有肥媽、陸浩明（6號），並曬出眾人為鼎爺提早慶祝80歲大壽嘅合照。
相中所見，即將滿80歲嘅鼎爺著格仔襯衫、啡色馬甲，頭戴牛仔帽，手捧小蛋糕，精神奕奕；李泳豪帶住太太Agnes，同6號圍喺後面向鏡頭嘟嘴作吹蠟燭狀，Agnes仲伸手輕捏下鼎爺臉頰，肥媽就笑吟吟靠喺鼎爺身側。
前因要講清楚：李家鼎2016年憑《阿爺廚房》爆紅，近年繼續經營YouTube頻道同不停開工。前妻施明今年3月離世後，隨即爆出孖仔李泳漢同李泳豪不和及爭產糾紛，成為全城焦點；事後鼎爺接受傳媒訪問時，公開宣佈同長子李泳漢脱離父子關係。就喺呢段時間，細仔李泳豪《愛‧回家之開心速遞》收工後得新工作，父子二人正式拍住上陣。
李泳豪喺IG寫：「今年迎來了全新的工作任務，非常榮幸能與肥媽、陸浩明以及我老豆一同出演新的飲食節目。這是我首次參與綜藝節目，更是我們父子檔的初體驗。」他又話，首日拍攝圓滿結束之際，一眾同事更貼心安排特別環節，「提早為老豆慶祝80歲大壽，由衷感謝大家對老豆的愛護與關懷」。
姣姐講多句：同一個老豆，一個大仔鬧到切斷關係，一個細仔帶住老婆入行，拍住老爸炒爐食飯。80歲仲話「從來冇諗退休」，細仔呢次唔係替老豆「頂硬」，真係頂硬。
黃姣姐整合｜頂硬上
