有啲人60歲就講退休享樂，韓國呢位阿婆，100歲仲係日日準時返工簽保單。
韓國「韓華產險」（Hanwha General Insurance）現役保險財務規劃師金淑子，1926年生，今年啱啱滿100歲。佢1983年入行，至今喺保險界打滾43年，始終每日準時到分行上班、同客户簽新保單，係公司最年長嘅現役財務策劃師。
公司唔單止讚佢，仲真金白銀搞咗場「儀式」。9月22日喺首爾汝矣島63大廈特設「韓華產險百年傳奇財務規劃師（FP）」致敬儀式，行政總裁羅采範同金淑子嘅家屬都到場。據知佢過去已先後攞到服務滿20年、30年同40年嘅長期服務獎。
金淑子喺儀式上話，同客户一齊走過43年，呢段同時顧住家庭同事業嘅經歷，得到公司同家人認可，令佢好幸福。企業發言人話佢喺百歲高齡仍然活躍前線，公司會以佢為榜樣，喺內部建立「傳奇典範文化」。
姣姐講多句：我哋呢度常講「打工仔」，講到骨都無，呢位阿婆真係「簽單」簽到100歲，簽到公司專為佢開場百歲致敬禮。係，呢個世界總係有啲人比你好努力——同好硬。
（佢入行嗰陣，你老豆可能都未出世。）
