無綫戀綜《女神配對計劃2》風波未停，今集輪番紅髮女神俞可程（Kanis）被盯上。事件源於 Threads 上一帖爆料：有網民爆朋友嘅前女友係幕前 KOL，接咗電視台戀綜，男方要求佢推 job、向公司申報非單身，佢堅拒，最終拍散，男方相信對方係「借啲意」飛起自己。帖一出，多位網民立即「對號入座」，將紅髮特徵對上節目中嘅 Kanis。
有網民（chanc9diary）稱 8 月 1 日曾目擊該名女參賽者喺元朗同「肥肥地男朋友」喺 Cafe 撐枱腳，指男方「掂埋佢pat pat咁樣攬腰」；另一名（u.so.cuteeeee）稱暑假期間喺元朗目擊該紅髮女生與一名肥港男同行，女方主動餵男方食嘢，男方「拎住大相機幫佢影咗好多相」。
網民續指時間線有破綻：Kanis 7 月已開始拍攝該戀綜，但 8 月 1 日仍被目擊同「肥仔」同出同入，隔幾日便上電視聲稱「真心想識另一半」，被嘲「笑左……反正就係拍緊嗰陣仲同緊肥仔一齊」。今日（1 日）爆料網民更上載兩張新相，稱喺元朗 Cafe 門外再次「野生捕獲」兩人互動，企圖佐證「非拍攝」説法。
面對圖文並嘅指控，Kanis 10 月 31 日接受《東網》訪問時大方承認自己正係被目擊嘅紅髮女生，但強烈否認男伴係男友，話：「好可惜對方係導演！」佢重申已單身一年半，更自嘲話下次外出，「可能要幫我拍嘢嘅導演帶番個工作證去證明係工作」。
「姣姐講多句」，呢單事最尷尬嘅位唔係網民點樣對號入座，而係一個公開節目參賽者嘅私生活，成日被幾萬人逐格逐格放大對照、逐日逐日時間線核對。無論真假，呢種「全民偵探」式嘅審查其實已經超出事實範圍。觀眾睇戀綜就睇個好笑，用唔着幫自己執波。
