有網民近日分享搭的士去啟德簡約公屋的經歷。佢上車後向司機表示「想去麗晶側邊簡約公屋嗰度」，司機即刻追問「彩石里定世運道呀？」。事主自認唔熟街道，改口講「近airside嗰邊呢！」，司機一聽就恍然大悟：「哦！天璽呀！」，仲霸氣補充：「你話去『天璽簡』就明㗎喇！係人都知㗎啦！」
原來，啟德簡約公屋喺的士界有一個豪宅級花名，叫做「天璽．簡」。呢個名係將一牆之隔、雄踞啟德站上蓋嘅豪宅「天璽．天」，直接crossover簡約公屋而成，聽落好有氣質，同豪宅一個路數。
帖文一出，樓主喺文內自嘆，佩服香港人總能用最體面的地名，記錄低理想同現實之間最魔幻嘅落差。網民大讚呢個花名夠貼地，笑言簡約公屋「即刻升咗幾個grade」；有人發揮創意，提議應該叫「簡·天璽」，又或者搭車時對司機講「唔該，天璽.簡」；更有人笑指「唔係應該『天璽．地』咩？一個天一個地（貼地）嘛」。
硬蕉抽兩句
一個係「天璽．天」，一個係「天璽．簡」，一牆之隔，同姓唔同命。司機大哥呢個就地取材嘅命名，好貼切咁記錄低理想同現實之間嗰條隱形界線：同樣喺啟德站上蓋，一個係供人仰望嘅豪宅，一個係供人居住嘅簡約公屋，差就喺最後個字。香港人最識用最有氣質嘅詞語去包裝最貼地嘅現實，「天璽．簡」就係一個最好嘅例子。呢個名，夠晒貼地，又夠晒魔幻。
