鄭星一喺《韓國製造 2》飾青瓦台秘書室長「千錫重」，權力第二把交椅，每次出鏡濃濃慶尚道口音、氣場十足。近期佢接受韓媒訪問，自爆呢個角色起初根本唔想接。

佢話當初嘅心態好直接：「要穿西裝、要撐出份量感，而且跟前作有重疊的地方，負擔很大。」當時佢正想擺脱《黑暗榮耀》「河度領」嘅形象，連番類似角色真係有抗拒，甚至一度刻意避開。最後因為太鍾意導演禹民鎬同班演員，才決定接。

最有趣係「千錫重」嘅方言係佢主動向導演提議加嘅。鄭星一本係大邱出身，慶尚道話對佢唔係問題，但做嘢太久、長年講標準語，佢坦言「平常不太用方言，感覺有點生疏了」。於是佢專程返大邱住一陣，揾朋友傾偈、講電話，反覆確認語調有冇走音。「家人之間還是會講方言，但因為平常真的不常用，怕講起來會卡卡的，所以回去找朋友們多聊聊，也靠通話不斷確認。」

心態方面佢亦講到轉勢。以前總想「我能超越河度領嗎」，甚至喺《戰，亂》挑戰演外國人；而家思路放寬：「如果大眾想看到的是那樣的樣子，那就沒必要刻意避開。」佢話演戲越難越想做正，街上有路人喊佢「千錫重叔叔」，佢好開心。

仲有句好抵死：佢自稱擺脱長年無名演員生涯後「終於變成正職」，以為唔使再驚「唔再有人請」，但反間開始擔心「什麼時候會被退休」。佢話呢種不安反而逼佢更努力，而最啱心嘅係——「現在最棒的是，不用再去試鏡、不用再等那麼久的結果了。」

姣姐講多句，一個青瓦台二號人物，最後靠返大邱揾朋友傾偈練方言先搞掂，呢個戲核比任何諜戰劇情都真實。

黃姣姐整合｜頂硬上