菊梓喬前晚出席《保良局週年慈善晚會》，被記者問到昔日緋聞男友吳卓羲同張曦雯拍無綫劇《璀璨之城》後被傳婚訊，佢反應好快，反問：「人哋結婚咪結婚囉，關我咩事？」
更抵讚係佢即興自薦做婚宴嘉賓，「佢哋嘅婚宴係可以請我唱歌，但要有歌酬」。問會唔會祝福，佢笑説：「我會祝福你（記者）先，因為我認識你。」再解釋若送祝福，前提係要認識男女雙方，「我做咩要祝福一啲我唔識嘅人？」
菊梓喬自稱久未追劇，又笑言自己記性差，對嗰套劇同嗰啲人，佢係真係無咩反應。
姣姐講多句：過氣緋聞變「關我咩事」，急智到冇朋友，自薦開騅仲要開單收費，呢種冷幽默真係娛樂圈罕有。
黃姣姐整合｜頂硬上
