因日本少子高齡化造成缺工，加上高空維修嘅職安風險，JR西日本近日正式宣佈，同機械人新創「人機一體」及日本信號共同研發嘅兩款「多功能鐵路重機」，將於2026年10月及11月陸續喺近畿及中國地區上線執勤。
目的係將高空維修机械化，大幅降低人員觸電及從高空墜落嘅職災風險，同時將現場人力需求壓縮約三成。
兩款機型各有分工。「重工業用單臂型機械人」裝設喺高空作業車上，機械臂可抓舉重達120kg嘅器材，代替工人爬上電線桿搬運架線金屬設備，實測成功將5人作業縮減為3人。「量產型人形機械人」則改良自2024年舊款，體重減半至約300kg，機械吊臂延伸至15米，專精高空伐木同防鏽塗裝。官方表示未來會將呢項技術推廣到公路同隧道等基建。
重點嚟喇，呢具散發濃厚戰鬥氣息嘅人形機械人一亮相，極具未來感嘅外型即喺日網引爆熱議。網友紛紛留言調侃：「絕對沒必要做得這麼帥吧！研發團隊裡肯定混進了鋼彈（港稱高達）狂熱份子，或者根本全員都是！」「這完全是工程師把個人愛好做成實體了。」更有人笑謂，宛如哥斯拉喺實際執行任務。
原本枯燥嘅高空鐵路維護作業，因呢份硬派美學，瞬間成為網民討論焦點。
姣姐講多句：認真做基建安全，做出嚟卻似從動漫走出嘅角色，呢種「工程浪漫」其實係日本機械人文化嘅典型體現。當枯燥工程遇上「帥」字，效果可以話係相當可觀。
