開假病單，首日就撞正主管
日本一名45歲女公務員喺所在市府單位任職，今年6月7日至16日期間請咗10日病假。點知喺請假首日，主管就喺車站見到佢拖住大件行李，完全唔似個病號，立刻察覺有異。
主管透過社群軟體試探佢嘅健康狀況，女職員答稱「身體不舒服，正在睡覺」。病假用完復職後，主管同其他人問話，佢起初仍持續説謊，直到後來先突然改口，承認「因身體恢復了，所以去了海外旅行」。
調查：冇睇醫生，診斷書係假
市府進一步調查，確認佢喺「病假」期間確實出咗國。更離譜嘅係，佢根本冇接受過診斷，診斷證明書係直接拜託一個熟識醫生開嘅假單。
9月30日，該市府正式宣佈，以「謊稱生病請假，並違法領取薪資」為由，對佢作出懲戒免職處分。女職員就事件發聲：「因為個人行為給大家造成麻煩，我感到非常抱歉。」
開假診斷證明嘅醫生亦冇逃過一劫。市府已就佢違規開立偽造證明，向當地警方遞交違反《醫師法》嘅告發狀。
網民反應：唔該被原諒
新聞曝光後，日本網民反應熱烈。有網民認為，公務員請假摸魚去海外旅行，無論點都唔該被輕易原諒，開假單嘅醫生亦應受懲罰。亦有網民認為，佢應該按正規方式請假，唔好鑽漏洞仲想攞薪金，搞到最後得不償失。
姣姐講多句：呢單最離譜嘅唔係佢請假出去玩，而係佢諗住扮病人仲想攞返病假薪金。請假係基本權利，但開假單就係另一回事。開假單嘅醫生係同謀，無咗呢張假單，乜都冇。想靠假病單鑽漏洞，先諗清楚代價係咪付得起。
黃姣姐整合｜頂硬上
