日本靜岡市一間鈑金加工公司，被自己嘅會計高層「炒到全盤翻」。當地一名56歲前會計總務部長，涉嫌喺2022年4月至2025年10月期間，偽造超過50張社長名義嘅支票，從公司户口提走約1.73億日圓（約863萬港元），全部錢用嚟「推活」，即支持自己鍾意嘅女偶像。
呢位前高管被捕前住喺東京都台東區。任內佢多次到銀行櫃枱兑現偽造支票，每次約110萬至830萬日圓（約5.4萬至42萬港元）。面對警方，佢坦言款項全數用於購買與偶像嘅「即影即有」合照、演唱會門票，甚至支付跟隨偶像到全國各地巡演的旅費、公寓租金，以及購買名牌貨。佢辯稱「次數太多，已記不清何時、提了多少」，但承認「確實是我做的」。
呢單案最早係今年9月爆露，佢當時已涉嫌以類似手法提走約2,200萬日圓（約109萬港元）而被捕。警方隨後擴大調查，揭發呢筆更大規模嘅公款虧空案，遂於10月13日對佢採取第2輪拘捕行動。目前涉事公司總損失或已接近2億日圓（約997萬港元），警方正追查款項最終流向。
姣姐講多句：講到「推活」，日本調查公司Video Research數據顯示，大多數參與者每年花銷喺1萬日圓（約500港元）以下；每年肯豪擲超過50萬日圓嘅狂熱粉絲，喺Z世代只佔3.6%，X世代更只有1.4%。呢位前高管，係把全公司嘅錢都當做偶像應援經費，係真係玩到「全盤翻」。成年人揾錢辛苦，花自己錢推偶像無問題，但花到公司破產，就唔係「推活」，係「虧活」喇。
黃姣姐整合｜頂硬上
