入行逾30年嘅歌手李樂詩（Joyce），日前（10月28日）迎來53歲生日，並喺社交平台分享了一組慶生照片。相中佢染着金黃長髮、化上精緻妝容，笑容燦爛，精神奕奕。呢場派對除咗有丈夫 Ted Lee 相伴，亦有樂壇巨星林子祥同葉蒨文夫婦，以及莫文蔚同佢嘅德籍丈夫 Johannes 等好友現身。
李樂詩喺貼文寫：「這個生日讓我想起我有多幸運，不是因為任何一件事，而是因為我生活中的每個人。這是又一年成長、感恩和健康的歲月！」
佢今趟生日之所以特別，係因為要交代一段唔輕鬆嘅抗癌歷程。李樂詩自2021年確診乳癌後，近年大幅減少工作量專心休養。佢因患病需要接受雙乳切除手術，未料後來經歷乳房重建四度失敗。佢坦白講：「完成切除乳房手術後一個月接受重建手術，但第一次手術後，傷口嚴重發炎紅腫且位置移位，外觀受損。之後不得不再次動手術取出重建填充物，一個月後又再接受手術。」
喺四個月內歷經四次手術嘅折騰後，佢最終決定放棄重建。佢話想同女士們講：「平胸也可以活得很好，這樣也很靚。最緊要身體健康，而且老公很支持我，最重要是我能陪在他身旁。」目前佢仍需服用抗擴散藥物，要完成為期五年嘅療程，並定期接受身體檢查。
除咗個人健康，李樂詩嘅事業亦冇停低。佢早年憑經典處境劇《真情》主題曲〈無悔愛你一生〉而家喻户曉，早前更同文佩玲、何婉盈合組「Super Queens」中年女團登台演出，掀起懷舊風潮。
姣姐講多句： 講真，見到一個人經歷咗四次手術，仲可以公開同全世界講「平胸也可以活得很好」，呢種坦同樂觀係好抵讚嘅。我哋成日為著外貌焦慮，佢用真實經歷證明，最緊要嘅係身邊人同健康。
黃姣姐整合｜頂硬上
