牛仔褲右前方個大口袋入面，仲嵌咗一個「小一號」嘅迷你口袋，好多人成日用嚟裝硬幣、鑰匙，甚至之前放過 iPod nano 同摺埋嘅紙鈓。但成件事原來同零錢冇乜關係——佢嘅正式名稱，本來係「錶袋」（Watch Pocket）。
呢件事喺 2026 年 10 月由日本熊本放送（RKK）報導。熊本市中心一間經營約 60 年嘅老牌牛仔褲專賣店「Jeans Shop Sanwa」，85 歲嘅社長梅田實雄喺接受訪問時講，呢個小口袋最早就係為咗收納當時男士必備嘅懷錶而設計。
呢個跨越 150 年嘅設計，源頭係牛仔褲鼻祖 Levi's 501。Levi's 官方紀錄指，品牌創始人同夥伴喺 1873 年取得鉚釘補強工作褲專利嗰陣，右前側已經配置咗呢個懷錶袋。早期嘅牛仔褲其實只有四個口袋，左後方嗰個係日後來追加嘅「第五個口袋」，足見錶袋喺設計之初嘅分量。之後 Lee、Edwin 等品牌爭相跟做，先變成全球牛仔褲嘅標準設計。
跟住腕錶普及、懷錶退場，小口袋嘅用途就慢慢變成放硬幣、鑰匙、戒指，因而得到「零錢袋」（Coin Pocket）呢個稱呼。梅田社長觀察到，昔日為咗容納懷錶，袋口約有三指寬；而家縮細咗，大約兩指寬，恰好夠放銅板。
硬蕉抽兩句：1873 年嗰陣，人哋喺工地上真係要戴懷錶，呢個袋就係為佢而生；而家人哋手機大過袋兩圈，未必入得去，但佢仲係留喺度。電子支付普及、零錢都唔使帶，呢個小口袋早已經冇乜實際用途，卻變成牛仔褲歷經一世紀半冇人敢動嘅經典。設計最恐怖嘅地方，就係你唔使知道佢有乜用，佢就得。
硬蕉哥整合｜頂硬上
