成人題材｜18+
日本獨立遊戲開發者「Hide」近日喺X（原Twitter）公開自己嘅苦況：耗時九年製作嘅18禁戰略遊戲《Deserter's》，竟然俾中國人盜版，內容遭竄改，仲俾人擅自翻譯成中文免費放上網。
「Hide」話，《Deserter's》今年3月先至陸續喺日本本土平台上架，而佢同合作廠商一直喺規劃遊戲登上Steam，原本中文版就係其中一個重點，擴充內容亦預計支援中文。
但就喺呢段時間，佢突然發現來自中國的瀏覽量同追蹤者猛增，起咗疑頭調查之後，就發現自己嘅作品不但被破解上傳，連遊戲內文都被翻譯成中文，內容遭竄改，甚至「貼心」地幫佢除錯。
佢喺X上寫道：「若是非法上傳倒也罷了，但擅自修改遊戲內容，實在是讓人無法接受。」
呢次事件令佢原本嘅中文版計畫瞬間泡湯，佢稱Steam中文版「在商業層面上已經無望了」，擴充內容中文支援「也只能泡湯了」。
「Hide」表示已經透過DMCA向資源網站提申訴，成功將盜版內容下架，稱目前情況「算是暫時止血了」。
但佢嘅情緒顯然受咗重大打擊。佢話自己「不是憤怒之類的，只是純粹的虛無」，並憶述一個素不相識的中國人，將佢九年心血嘅遊戲翻譯免費發佈，「還説『請盡情享受』，彷彿那是他親手創作的一樣」。
佢又話自己已從事創作活動約四分之一個世紀（約25年），而呢次事件令佢甚至失去製作新遊戲嘅動力，並表示正在考慮完全退出中國市場。
姣姐講多句：做咗25年創作嘅獨立開發者，九年心血喺一夜之間變咗「免費請你食」，呢種虛無感，大概就似你煲咗一鍋老火靚湯，開蓋發現被人偷走晒——唔係嬲，就係真嘅冇嘢講。小開發者對住盜版，呢種結構性脆弱係幾十年都無解決過。
黃姣姐整合｜頂硬上
